[b]عيشة فولاد حريز وتفكر في روما[/b]

إيه آعويشة، ما كانش يسحبليك غيطول بك زمان حتى تعيشي وتشوفي: لبكيرات تباعو والأرض داها ليك لواد واخا هو واد ناشف، وقطعو حتى دوك الزيتونان لكانوا مضللين عليك شمس ولاد حريز الحارة. وفين هما ولاد حريز، دوك الرجال لوراو المستعمر الويل، شي مشا لدار لبيضا وشي مشا لصحرا كليك مشاو يحرروا تراب لبلاد. ممن؟ إوا تم فين بركات العجلة. ومنديك الساعة ما ليهم أثر، تكول كلاتهم. وشي كال ليك حتى شاب عاد مشى لدار النصارى كاليك خاصوا طوموبيل وشي زعرة، وميلي دازت ليام رجعوه فصندوق ودفنوه فظلام الليل. إيه أعوشة بيعوك لبكريات والخيمة ولبليدة لداها الواد الناشف، وهزيتي لوليدات ومشيتي للدار البيضا حيت كالوا ليك هاذك هي جنة. وتم باعوا ليك ش سماسرية ديال ديك الانتخابات لكالوا راها نزيهة وما فيها غش، براكة قريبة للحي الصناعي لكيطل على لبحر، تم عمرتي سطل بما سبعة لموجات، ورشتي بيه قناة البراكة وعومتي بيه لوليدات باش تحيد عليهم التابعة والعين. وملي طلع الفجر اللول والثاني وحتى الثالث ومدق حد عليك بابك، صيفتي البنت لبكرة لمعمل لخياطة، وغير لبنت فدكت ما بقيتي حصلتي على والو. إيه آعويشة لبنت طمعو فيها ذياب لمدينة. وطلع فجر جديد، وصيفتي الولد الصغير مع خوه لكبر منوا للمدرسة، وخرجتي تخدمي، هانتي مرة صبانة فديور كبار لمدينة وكون مكنتش للا ومولاتي كون طمعو فيك، هاد شي علاش ما كطوليش فديك ديور لكالوا كبيرة.اصبرتي أعوشة لحريزية وكل ما ضلم الليل كثكولي ما بقى قد ما فات، دروك لوليدات يكبرو ويعوضوك على ما ضيعوه ليك. ومرة خضارة تعيطي بصوت مبحوح حتى تجي لحملة ديال لمرود ويدوليك خضيرتك وتم ما كيبقاليك غير تطلبيهم يردوا ليك الميزان.
ومنين صبح لحال ، وخاد وليدك لكبير لبكالورية، وفرحتي وزغرتي وكلتي مع راصك قريب لفجر يطل، وبلفعل هرسوا لك لباب غير من لقصب وداوليك لولد وجمعو حتى كتيباتوا، حك كالوا ولدك كيتبنى خرايف الطبقة لعاملة، وبقيتي ساهيا ما فهما والو، ومن شرحو ليك شي خيات شنوهي الطبقة العاملة، جاوبتيهم ولحيرة فعينيك: ولدي معمرو مخدم. ويام ويام كليلها كنهارها بشتاها وصيفها ونت تقلبي عليه ولا من عطاك راس لخيط،، ماخلتي حبيب ولا عرديد حتى بويا عمار وبوشتة لخمار ولالا بحرية ومول لمجمر وعلي بنحساين ولال منانة وت دوك ليضربوا لكرطا، وحتى عند شي وحدين كالو ليك عليهم راهم هما الشان والمرشان فهاذ لبلاد لباعو ليك فيها الخيمة ولبكيرات والبليدة لداها ليك لواد الناشف. وليتي طامعا غير تعرفي فين هي لحفرة لرماوه فيها غير باش تزوريه كل جمعة وترشي عليه ششوية دلما زهر وتقري عليه شيشوي دلقرآن. وطل صبح جديد وكففتي دموعك غير فالنهار، وحزتي امرك لله، وحمدتيه ، وكلتا مع راسك يمكن الخير فالولد الصغير. وفلعشية من لعشيات وانت راجعة مهدودة من شي دار ديال دوك لكيكولو عليهم كبار، ما لقتي ولد ولا خبار عليه غير شي واحد من الخوت شافوا هاذ ليام كيمشي للمرسة، وخ ولدك ماهو بحار ولا يحزنون. إيه أعويشة ، هي ولدك حرك، غروه دوك لحراكة لكيجيو كل صيف ،جيبين معم طوموبل وعامرة بلخردة ديال نصارة، ويضلوا يدورو بالليل وبنهار مهربطين وفاضحين الدرب.
أيه أعويشة، مشات لبكيرات وتباعت لخيمة ودا الواد الناشفة لبليدة، والبنية سرطها ليل لمدينة، ولولد لكبير راه فالغباك حك كالوا هو وشي رهوط بغاو يقلوبا لبلاد سفاها على علاها زعما راها مكادا وتابتا، والصغير يمكن يكون فروما أو فقعر لبحر.
إيه أعويشة لقلب فولاد حريز وتفكري فروما والأولاد ضيعتهم لبلاد.